BATANGAS NEWSS

Please read....

Go Zero-MARITIME
The Reportorial Team


BATANGAS CITY-Malakas ang kampanya ng Maritime Industry para sa pangangalaga ng kalinisan ng karagatan at kaligtasan sa pagbibiyahe. Ito ang sentro ng isang linggong pagdiriwang ng ika-6 na anibersaryo ng Maritime Industry na nagsimula noong ika-22 ng Setyembre.

Ang naturang selebrasyon ay may temang “GO ZERO : ZERO MARITIME POLLUTION, ZERO MARITIME INCIDENTS’. Nakapaloob dito ang iba’t ibang gawain na mag-aangat sa kamalayan ng publiko ukol sa mga programa ng industriya at kampanya nito sa pangangalaga sa kapaligiran. Layunin din nito na lalong mapaigting ang magandang ugnayan ng lahat ng ahensiyang bumubuo sa industriya.

Tulad ng mga nagdaang taon ang selebrasyon ay inumpisahan ng Banal na Misa sa PPA Grounds. Kasunod nito ay ang Motorcade, at ang pagbubukas ng selebrasyon na idinaos sa Port Area, Passenger Terminal.

Kabilang pa rin sa mga gawain ay ang film showing sa Port Passenger Terminal 3 at talakayan na may titulong “Maghuntahan Tayo” sa Lyceum Maritime Academy (LIMA) kaninang umaga. Dito ay tinalakay ang mga hakbang na ginagawa ng Maritime Industry upang maiwasan ang polusyon sa karagatan at ang aksidente dito.

Dito ay ipaalam rin ang mga state of the art facilities at equipment ng Batangas Port na ginagamit para sa mas maayos, mabilis at ligtas na serbisyo sa lahat ng gumagamit ng pantalan. Sa pamamagitan din ng mga makabagong pasilidad na ito ay naiiwasan ang anumang ilegal na gawain sa port.

Ang mga gawain para sa pagdiriwang ay pinamamahalaan ng mga pangunahing ahensiya ng Maritime Industry tulad ng MARINA, PPA-Batangas Port, Clear Maritime Training Center at ang Montenegro Shipping Lines.