NEWS IN QUEZON PROVINCE

Please read....




25% DISCOUNT IPAGKAKALOOB NG GENERICS PHARMACY

LUCENA CITY- Inihayag ni G. Normel Panganiban ng The Generics Pharmacy Lucena City na may 25 percent na diskwento ang maaari nilang ipagkaloob sa mga senior citizens na bibili ng gamot hanggang October 30, 2008.

Ang nasabing pahayag ay ginawa ni Panganiban sa ginanap sa pagtitipon ng mga senior citizens ng lungsod ng Lucena na ginanap sa Social Welfare Complez, Zaballero Subdivision Lucena City . Dito ay tinalakay ni Panganiban ang mga kagalingan at pangtangkilik ng generic medicine na sinasabi ring mas mura kapag bibilhin sa alinmang generics pharmacy.

Ayon pa kay Panganiban kapag natapos na ang buwan ng Oktubre muling ibababalik ang regular na diskwento na 20 percent ng generics medicine sa mga senior citizens. Sa kasalukuyan ay mayroon ng 153 branches ng The Generics Pharmacy sa bansa ang maaaring puntahan ng mga senior citizen para makabili ng murang gamot. Idinagdag pa niya dito na dapat dalhin ng mga senior citizen ang kanilang ID kapag bibili ng gamot sa sa generics pharmacy upang mabigyan ng diskwento.

Ang pagtitipon ng mga senior citizens sa nasabing lugar ay kaalinsabay din sa pagdiriwang ng National Family Unity Week na may tema na Fathers and Families: Responsibilities and Challenges “Maabilidad si Dad” kung saan may mga isinagawang programa ang CSWDO sa pangunguna ni Gng. Lourdes Ruanto na sinuportahan naman ng punong lunsod Mayor Ramon Y. Talaga Jr., gayundin ang iba pang mga ahensiya ng pamahalaan at mga paaralan sa lungsod na ito.

WORLD RABIES DAY INILUNSAD SA QUEZON

PAGBILAO,QUEZON- Mahigit sa 200 mag-aaral ng Pagbilao Central Elementary School ang dumalo sa Rabies Symposium na isinagawa ng Integrated Provincial health Office (IPHO-Quezon) sa pakikiisa ng Department of Health Region IV-A at ng Provincial Veterinarian Office sa Pagbilao Central Elementary School- Social Hall sa bayang ito.
Ang nasabing symposium ay ginawa kaugnay sa pagdiriwang ng World Rabies Day. Kabilang sa mga naging tagapagsalita sa Rabies Symposium sina Sheila Berbano (World Rabies Day Celebration); Randolfo Tolentino (Status of Rabies in Quezon & The Philippines); Dr. Elma Ladiana (Anti-Rabies Act of 9482); Dr. Venus Victoria (Integration of Rabies Program in School Curriculum) at Dr. Isagani Requizo (A look on Tayabas Rabies Program).
Nauna dito, nagkaroon din ng motorcade na dinaluhan ng iba’t-ibang ahensiya ng pamahalaan na miyembro ng Provincial Anti-Rabies. Nakiisa rin sa motorcade ang lokal na pamahalaan ng Pagbilao at ang DOH Region IV-A.
Pagkatapos ng motorcade, isinagawa rin ang isang maikling programa sa PCES-Social Hall at isa sa mga naging tagapagsalita dito si Dr. Nimrod Villanueva ng CHD-IV-A Extension Office-Quezon.
Dito ay binigyang diin ni Dr. Villanueva na dapat maging responsible owner ang mga taong nag-aalaga o may-ari ng aso upang makaiwas sa rabies at ito ay aniya ay magagawa sa pamamagitan ng mga sumusunod: Pagpaparehistro ang alagang aso sa lokal na pamahalaan.
Kailangan din na pabakunahan ang alagang aso taun-taon; Huwag hayaang gumala ang alagang aso sa labas ng bahay o bakuran at kailangan din aniyang sagutin ang pagpapabakuna ng taong nakagat ng alagang aso.
Ipinapayo rin na kapag nakagat ng aso o pusa ang isang tao, kailangang linisin agad ng sabon at tubig ang bahagi ng katawan na nakagat at pagkatapos ay magsadya kaagad sa pinakamalapit na Animal Bite Treatment Center.
Tampok din sa isinagawang programa ang pagbibigay ng premyo at certificate sa mga mag-aaral na nagwagi sa isinagawang Poster Making Contest gayundin ang paglagda sa Pledge of Commitment ng iba’t-ibang ahensiya ng pamahalaan kagaya ng PNP, DepEd, PIA, Provincial Veterinarian Office, Pamahalaang Panlalawigan ng Quezon, DOH Region IV-A, Lokal na pamahalaan ng Pagbilao at iba pang ahensiya ng pamahalaan na tanda ng pagsuporta sa R.A 9482 o Anti-Rabies Act of 2007.



HEADQUARTERS
76TH INFANTRY (VICTRIX) BATTALION, 2ND INFANTRY DIVISION, PA
Brgy Villa Principe, Gumaca, Quezon

TROPA NG 76IB, 2ID, PA NAKA RECOVER NG MGA PAMPASABOG
(16 October 2008)
GUMACA, Quezon – Isang Brgy Kapitan sa bayan ng Macalelon ng lalawigang ito ay dumulog sa himpilan ng Bravo Company, 76IB noong ika-15 ng Octobre 2008 sa ganap na alas 10:00 ng gabi at nagbigay impormasyon tungkol sa nakatagong mga kagamitang pampasabog sa isang bahay sa sitio Bunga ng kanyang Barangay.

Dahil sa impormasyon na bigay ni Brgy Captain Victor Orijuela, agad na nagplano si 1LT JESSIE BERGONIA, punong opisyal ng Bravo Coy, 76IB at inatasan ang kanyang dalawang squads na pinamunuan ni 2LT EDUARDO PRECIOSO JR upang aksyunan ang nasabing impormasyon.

Noong ika-16 ng Octobre 2008 sa ganap na ala 5:30 ng umaga, agad na pinuntahan ng tropa kasama si Brgy Kapitan Victor Orijuela at mga kagawad nito ang kinalalagyan ng kagamitang pampasabog. Sa ganap na alas 9:00 ng umaga ay natagpuan nila ang tatlong timba na naglalaman ng mga Improvised Explosive Devices (IED).

Ayon kay LT COL TELLO, pinuno ng 76IB, ang pagbigay impormasyon ni Brgy Kapitan ay nagpapatunay na gusto na nila ng katahimikan sa kanilang lugar. Isa itong malaking tulong sa ating mga kababayan sapagkat naiwasan natin ang malagim na planong pagpasabog ng mga CPP-NPA-NDF sa mga publiko at pribadong mga istraktura. Ang ganitong mga pangyayari ay isang indikasyon na wala ng sumusuporta sa organisasyon at karahasan ng CPP-NPA-NDF, kung kayat patuloy ang pakikipag-ugnayan ng mga kasundaluhan sa ating mga kababayan at lokal na pamahalaan upang manumbalik ang kanilang tiwala sa ating gobyerno, muling bumalik ang dating sigla at katahimikan ng ating bayan at tayo ay magkaisa tungo sa maayos at demokratikong lipunan.


HEADQUARTERS
76TH INFANTRY (VICTRIX) BATTALION, 2ND INFANTRY DIVISION, PA
Brgy Villa Principe, Gumaca, Quezon
Battalion Contact Number: 0918-437-3479


“LIBRENG GAMUTAN HATID NG ROTARY CLUB, APO Fraternity AT NG 76IB”
(13 October 2008)

GUMACA, QUEZON – Isang libreng gamutan ang ipinagkaloob ng Rotary Club, APO Fraternity at ng 76th Infantry Battalion, Philippine Army na ginanap sa Brgy Mabunga, Gumaca, Quezon, noong ika-12 ng Octobre taong 2008.

Ang nabanggit na gamutan ay dinaluhan ng ibat-ibang residente ng Brgy Mabunga, Brgy Bungahan, Brgy Casasahan Ibaba, Brgy Bitaog at Brgy Mataas na Bundok ng nasabing bayan na kung saan umabot sa kabuuang bilang siyam napo at anim (96) ang nabigyan ng benepisyong medical at dental.

Ang mga doktor ay pinamunuan ni Dr Elchor M Caralian ng Rotary Club Gumaca, Dr Adiente ng Calauag, Qzn at sina Maj Toraray at Cpt Suarez naman ang namuno sa Dental at Medical team ng SOLCOM.

Ayon kay LT COL ROMMEL K TELLO, punong opisyal ng 76IB, napakahalaga ng ganitong gawain sapagkat ito’y isa sa mga paraan upang maihatid ng mga nagmamalasakit na mamamayang nasa kalunsuran ang mga serbisyong kinakailangan ng mga maralitang nasa kanayunan. Ipinakikita dito ang pagtitibay ng pagkakaisa ng mga mamamayang nagdadamayan upang maramdaman ng ating mga mamamayan na sila ay hindi natin kinakaligtaan at pinababayaan.

Certified correct:

Lieutenant Colonel ROMMEL K TELLO
Commanding Officer