KALIWAT KANAN NI JET CLAVERIA

Kaliwat kanan
Ni Jet Claveria


GO ZERO;MARITIME

Maganda ang ginagawang kampanya ng Maritime na maglinis ng karagatan upang mapangalagaan ang kalikasan.Mapaglapit ang ugnayan sa mga local executives upang magkatulungan.

Maganda ang ganitong mga adhikain ng Maritime.Yon bang maaalis na sa kanila ang katawagang moneytime.

Kunsabagay minsan naman wala ring magawa ang Maritime.Manghuhuli ng illegal fishermen ay kulang naman sa mga pasilidad ay nakalayo na lamang baga ay wala pa silang gagamiting bangkang panghabol.

Minsan naman saka kikilos ang mga iyan kapag mayroong babatikos sa kanilang ahensya na walang ginagawa kundi ang mangotong.Araykupo…..

Hala maganda ang inyong naisin ang pangalagaan ang kalikasan at yamang dagat ..Goooo

Okey ang ginagawang ito ng Maritime Batangas ah…

Sa Quezon mukhang tahimik… ang karagatan ba o ang ahensya…baket?

BULAKLAK…KANDILA…BIRTHDAY

Hindi ko alam kung sinasamantala o talagang mataas ang presyo ng mga bulaklak at kandila ngayon .Kaya naman sabi nong isang nakausap ko na binata na mahilig magbigay ng bulaklak sa kanyang nililigawan ,di siya makabili now kasi ang mahal.

Kaya malas ng kanyang nililigawan di makakatanggap ng bulaklak hanggang mataas pa ang presyo nito.Kuripot din .


Pero dahil All Saints Day marami pa rin ang bibili nito at dadalhin sa puntod ng kanilang mga kamag-anak na namatay .Maglilinis sila ng mga puntod at minsan ay dito pa sila nagdaraos ng kanilang reunion.

Tradisyon na sa mga katolikong Pilipino ang magtungo sa puntod ng kanilang mga mahal sa buhay upang doon sila magsama-sama.

Kaya naman lahat ng mga traffic enforcer ngayon ay naghahanda na para sa posibleng maging daloy ng trapiko.Mayroon nang mga inihahandang programa ang PNP para mapanatili ang peace and order sa mga lugar.

Ngayong November 1,mahalaga rin sa aming pamilya ang araw na ito.Kasi kwento ng aking Ina ,noong ipinanganganak niya ang ikatlo sa aming magkakapatid ay mayroong nangangaluluwa sa aming bahay noon sa Binagbag.


Birthday ng aking kapatid na si Yolly, ikatlo sa aming apat na magkakapatid na siyang huling nagka-asawa sa aming apat.

Nawili kasi itong si Yolly sa pagtatrabaho sa Hong Kong sa piling ng kanyang mga kaibigan doon.

Kakaiba nga itong kapatid kong ito na siyang pinakatahimik sa aming magkakapatid na hindi aakalaing siya ang malalayo sa amin ng mahabang panahon.

Siya rin ang maituturing kong pinakamasipag sa aming magkakapatid noong mga dalaga pa kami dahil napakalinis niya sa bahay at sa mga gamit.

Kaya naman kapag narito siya sa Pilipinas galit siya sa kaniyang mga pamangkin na tatamad-tamad.


Masuwerte ang aming pamilya sa pagkakaroon ng isang Yolly na siyang tumatayong taga-pangaral ng lahat.Pangaral as in lagi siyang nagre-remind sa aming lahat .kahit sa text at tawag sa phone na baka panay trabaho at nakakalimutan na si Lord.

Lagi niyang ipinaalala sa amin na ang lahat ng ginagawa natin ay panlupa lamang at di naman madadala sa kabilang buhay.Kaya sabi niya huwag makakalimot na mag pray palage.

Ganon ang aking kapatid…napakamaalalahanin,lalo na sa Inay....

Hehehe…may pasalubong kaya ako nito pagdating…Birthday kasi niya November 1 at syempre di namin siya makakasama kaya isang pagbati na lamang ang ibibigay namin sa kaniya.Happy birthday mula sa Tatay at Inay sa iyong mga kapatid at sa mga pamangkin at higit sa lahat sa iyong apo sa pamangkin, si Wisdom.



HATI QUEZON,NALILITO ANG TAO

Tunay nga namang nalilito na ang mga taga Quezon kung ano ba talaga Irog?

Samut saring mga balita ang naglilitawan na magkakaroon na ng plebisito sa paghahati sa lalawigan.

Meron namang nagsasabi ng hindi naman matutuloy ito dahil maraming aayaw.

Mayroon na daw pondo ang COMELEC ,sabi naman ni Atty. Sonny Pulgar ay wala naman daw katotohanan iyon.

Tapos sabi ang plebisito ay Nov. 22 sabi naman ng iba Nov 10.. ano gang totoo?

Marami kasing mga mamamayan ang nagtatanong.nasa anong status na ba ang nasabing usapin at nagkakaroon na ng mga pag-aalinlangan sa mga lumalabas na balita.

Marami tuloy nabubuo sa kaisipan ng mga taga Quezon,kapag nahati ito ay tiyak na lalabang gobernador si Mayor Ramon Talaga Jr. at sa kabilang hati ay mga Tanada at Suarez.

Hala ano na iyan baga.





OPLAN KALULUWA 2008 KASADO NA
By:Public Information Office

Kasado na para sa darating na Nobyembre 1 ang OPLAN KALULUWA ng Lucena City Police Station kaugnay sa pagdiriwang ng All Saints Day kung saan inaasahan ang pagdagsa ng mga tao sa lahat ng sementeryo dito sa lunsod.

Ang OPLAN KALULUWA ang programa upang maging maayos ang daloy ng trapiko at kombeyente para sa lahat. Nakapaloob dito ang gagawing traffic re-routing kung saan sa isang araw ay magkakaroon ng pagbabago sa mga linya ng mga jeep lalo na ang papuntang Dalahican, Ibabang Dupay at city proper. Tinanggihan din ang panukala ng mga tricycle driver na makapasok ang mga tricycle malapit sa mga sementeryo. Wala din naman aniya na nabago sa mga nagdaan OPLAN ang magaganap, bukod sa bilang ng mga organic personnel, mayroon pang augmentation at ang dagdag na mga bagong police officers 1.

Sang-ayon kay P/Supt. Ronaldo Genaro Ylagan, hepe ng LCPS, maghihigpit sila sa mga taong magdadala at mag-iinom sa loob ng sementeryo at ipinagbabawal din ang pagdadala ng nakamamatay na armas maging ang malalakas na tugtog. Aniya, ang lugar na ito ay isang pook na kailangan ang katahimikan upang bigyan daan ang pagdarasal ng mga naiwan nilang kaanak. Idagdag pa dito ang maiwasan ang anumang kaguluhan sa loob ng sementeryo.

Pinaalalahan din ni P/Supt. Ylagan ang lahat na maging alerto lalo na ang mga taong walang maiiwanan sa kanilang bahay na tiyakin na safe at hindi mapapasok ng magnanakaw ang kanilang bahay habang sila ay nasa sementeryo. Dito aniya makakakuha ng pagkakataon ang mga magnanakaw na pumasok sa bahay na walang naiwan o kaya naman ay hindi nakakandado ng maayos.

Koordinasyon at kooperasyon ang panawagan ng naturang hepe ng pulisya para sa lahat tungo sa maayos at tahimik na pagdiriwang ng araw ng mga patay.