IRON WILL NI CELINE TUTOR

IKALAWANG PAGTITIPON 2008. Ipinaliwanag ni Quezon 2nd district Rep. Procy Alcala kina Celine Tutor ng pahayagang ito at Randy Remontigue ng Channel 8 na naglalayong higit na magkatulungan ang mga magsasaka partikular na ang mga maggugulay sa Quezon , Benguet, Cavite, Bukidnon, at Ilocos Sur ang isinagawang Ikalawang Pagtitipon 2008 na may temang "Kwentuhang May Kabuluhan, Sama-Samang Pagtiyak sa Pagutulungan" na isinagawa sa Pueblo Por La Playa sa Pagbilao, Quezon. Isa aniya itong pagtiyak na de-kalidad at sapat ang suplay ng mga gulay sa mga susunod na panahon. King Formaran



Ikalawang Pagtitipon 2008
Ito ang titulo ng ginawang pagsama-sama ng may dalawang araw ng mga malalaking negosyante sa Pilipinas mula sa sektor ng maggugulay. Ginawa ang IKALAWANG PAGTITIPON 2008 noong Huwebes at Biyernes sa Pueblo Por La Playa sa Pagbilao, Quezon.
Hindi ordinayong nagtatanim ng gulay ang nakita ko sa Pueblo Por La Playa dahil sabi nga ni Cong. Procy Alcala ng 2nd district ng Quezon Province ay mga multi-millionaire ang mga ito at umangat ang buhay dahil sa gulay at iba pang naaaning produkto. Marami ring natulungan ang mga ito na magsasaka sa kani-kanilang lugar.
Mula sa Baguio, Benguet, Bukidnon, Cavite, at Ilocos Sur ang dumalo sa nasabing pagtitipon na may temang: “ KUWENTUHANG MAY KABULUHAN, SAMA-SAMANG PAGTITIYAK SA PATUTUNGUHAN”.
Paliwanag ni Cong. Alcala kung bakit kwentuhan lamang ang ginamit nilang salita sa kanilang pagpupulong ay dahil sa walang pulitiko sa Glory to God Food Corp. o GTGF.
Kung meron man, tulad niya ay hindi siya kabilang sa GTGF dahil sa siya’y Kongresista kundi dahil siya’y isang magsasaka.
Kasama niya sa GTGF ang mga milyonaryong nagsu-suplay ng gulay sa iba’t-ibang bansa.
Tuwang-tuwa ang mga taga-Benguet kay Cong. Alcala. Ito’y dahil sa personal umanong tinutungo ng Kongresista ang mga gulayan sa kanilang lugar at hindi tulad ng ilang nasa ahensiya ng pamahalaan na pumupunta lamang para magpa-picture lamang.
Sabi nga ni Mr. Francis ng Benguet, ‘nung una ay hindi sila maniwalang Congressman si Cong. Alcala dahil wala umano itong ipinag-iba sa mga magsasaka ngunit nang magtungo sila sa Quezon at nakita nila ang mukha nito sa mga billboards ng mga pagawaing pang-imprastraktura ay naniwala na sila.
Bilib sila kay Cong. Alcala. Bihira umano ang tulad nito na talagang nagpapakahirap at hands-on sa ibinibigay na programa sa mga tao.
Ang pagtitipon na ginagawa ng grupo ng GTGF ay ginagawa tuwing ika-anim na buwan ng bawat tao. Sama-sama silang nag-aaral kung pa’no magkakatulungan lalo’t higit kung may problema ang isang lalawigan.
Ikinasisiya naman ni Cong. Alcala ay ang gagawin din na paggamit ng Organic Fertilizer ng mga taga-Benguet at iba pang lalawigan sa kanilang pagtatanim.
Bagama’t ngayon pa lamang pag-aaralan ng tulad nina Mr. Francis ang paggamit ng organikong pataba sa kanilang mga pananim, matagal naman na itong ginagawa sa 2nd district ng Quezon Province.
Ipinagmamalaki ni Cong. Alcala na ang paggamit ng oganikong pataba ay naiiwasan ang pagkakaroon ng ilang problema tulad ng pinangangambahan ngayon ng mga taga-Benguet na namamatay ang kanilang lupa dahil sa mga commercial fertilizers.
Ito aniya ang epekto ng mga commerciala fertilizers. Dumarami nga ang ani ngunit may problemang dulot ito na sa paglipas ng panahon ay magdudulot ng pagkamatay ng lupa na hindi na mapapakinabangan pa upang magkaroon ng maganda at maraming bunga ang bawat pananim dito.
Isang malinaw na halimbawa sa mga negosyanteng nagtungo sa lalawigan na maganda ang programa ni Cong. Alcala at t’yak na gagawin din nila ito sa kanilang mga lugar.
Sabi nga nila, napakaswerte ng mga taga-Quezon dahil may isang Kongresista na masipag at hindi tulad sa kanila. Kung meron man aniyang programa ay hindi katulad ni Cong. Alcala na personal na nakikipag-usap sa mga magsasaka.
Kita n’yo, hindi lang ako ang nagsasabing mahusay talaga si Cong. Alcala.

SMFI Dental Mission
Hindi nauubos ang mga programang magaganda na ipinagkakaloob ng SM Foundation, Inc. sa mga taga-lungsod ng Lucena at sa mga karatig-lugar nito sa Quezon Province.
Kamakailan lamang ay nagsagawa ng Medical Mission ang grupo ng SMFI at SM City Lucena sa Talipan District Jail sa Pagbilao, Quezon. Matapos lamang ang ilang araw, heto’t nagbigay naman sila noong Martes ng Dental Mission sa nasabi pa ring piitan.
Isang pagpapatunay ito na may malaking puso ang SMFI sa mga nangangailangan. Kahit mga inmates, hindi nila nakakalimutan na tulungan. Ang IRON WILL ay naniniwalang hindi lahat ng mga preso ay nagkasala. Ilan sa mga ito ay biktima lamang ngunit magkagayunman, walang pinipili ang SMFI sa mga bibigyan ng tulong.
Daan-daang inmates ang natulungan ng nasabing dental mission. Salamat sa SOLCOM, kay Lt.Gen. Delfin N. Bangit at sa mga taga-Antipolo at Calamba District Jail na tumulong sa programa.
Tandaan n’yo, ang SMFI ay tulad din ni Quezon 2nd District Engr. Cely Flancia na tila ‘di napapagod basta’t para sa kapwa.